الواجهة الرئيسية I منتديات خزامى نجد I  إتصل بنا
 
 
دواوين الشعراء
القصيدة
قصيدة تعبت أعيش الواقع احلام وأزريت..!صوتيه..! للشاعر ناصر مطلق البقمي
 

تابع جديدي سجل زواري إهداء القصيدة رشح قصيدتي فهرس ديواني




تعبت اعيش الواقع احلام وازريت=وتعبت اقابل طعنتك بإبتسامه
وتعبت اراقب خطوتك بس ماجيت=وأقول ابا انتظره يجي بالسلامه
لو ليت تنفع قلت ياصاحبي ليت=بأقولها لو كان تلحق ملامه
زرعتك بشريان قلبي وسقيت=بذرة غلاك بدم قلب" غرامه
خلاه ينتظرك ولا قال مليت=والياس نصب قدم عينه خيامه
قطع الأمل تقضي حياتك كما الميت=كان الأمل أعلن بها انهزامه
وانا ليا من قلت طبت وتشاليت=ناحت على غصون الجروح الحمامه
الوقت يجرحني وانا اقول كفيت=جرحك يدرسني وغصب أحترامه
البارحه كلمت نفسي ومنيت=منيتها وابليس نفذ كلامه
ثم انتبهت إل فكرته لي وفزيت=وأستغفر الله من بليس وظلامه
ماهيب صعبه اعتذر كاني اخطيت=الصعب ارخي هامتي للرخامه
والمستحيل بمبدأي لا تحاكيت=الانحناء بذل عقب استقامه
والياس لامنه بنا داخلي بيت=يبقى الأمل لا حد يوم القيامه
يامخرج الميت من الحي والميت=من حي يخرج ثم تكسي عظامه
أخرجني امن الضيق لن كان ونيت=واطلق دموعي من عيون الندامه
لا حل ثلث الليل الأخر وصليت=وأرخيت لك في سجدة الوتر هامه
ودعيت واضنيت المدامع وبكيت=والشوف صابه من بكائي جهامه
وخلصت من وتري وانا ماتراخيت=ورفعت كفيني رجا بالكرامه
تكرمني بعفوك وانا الكف ماارخيت=راغب حلال الله وكاره حرامه
يارب انا لو كان مخطي وضليت=تايب وعفوك عنه غاية مرامه
يارب انا شاعر وكم عالم أغويت=هاموا معي والقلب معلن هيامه
ويارب انا في حسنتي وان توانيت=مخلوق طين وكاثرات" اثامه
ويارب انا بأفعالي ان كان جازيت=والله لا ادش النار يوم القيامه
يامن ملكت الكون ثمن تعليت=انت الذي بإيدْك مصاير انامه
أوزعني إل طاعتك وان كان زليت=لا تأخُذّني بالزلل وأنعدامه
وأكرمني بعفوك من ذنوبي ازريت=طهر العفو دمعه تلاها ابتسامه


نشرت بتاريخ 12-09-2007


 


Powered by Dawaween V 1.03
تصميم - برمجة

تصميم : الرّاسم لخدمات التصميم برمجة : أبعاد الإنترنت للتطوير