الواجهة الرئيسية I منتديات خزامى نجد I  إتصل بنا
 
 
دواوين الشعراء
القصيدة
قصيدة مناجاة و نصيحة للشاعر مطلق بن راشد القعيمه
 

تابع جديدي سجل زواري إهداء القصيدة رشح قصيدتي فهرس ديواني



يالله يا كاشف كروب المكاريب=ياقابل التوبه من العبد لا تاب
ياعون من شحو عليه المعازيب=وحوط عليه الضيق من كل الاصواب
مدات جودك ما عليها حواسيب=وما دونها تفتيش حراس وابواب
بآيات فضلك تشرق الشمس و تغيب=والليل هاجوع النواظر والالباب
ياسامع دعوة مناجيك ومجيب=لا فيض اعباره بالاسحار طلاب
ما شاف من دونك وجيه مغاضيب=ولا كلفه تسطير معروض وكتاب
حاشاك يا محي القفار المجاديب=تقطع رجا من يرتجي منك الاوهاب
لك ما لاحد غيرك يمد الطلاليب=ومن خشيتك تغرق مدامعه الاهداب
ياممهل العاصي وللمحسن مثيب=ياعالم الخافي ولو دونه حجاب
مابين ترهيب ومابين ترغيب=آيات سلطانك على حضر واعراب
ارسلت خير الرسل بشرى وتهذيب=وبيتك حميته من هل الفيل ابو ناب
واظهرت يونس من وحيش الغيابيب=يوم التقمه الحوت من دون ينصاب
من تحت ظلمات ثلاث حجاجيب=ناجاك وانجيته بعد جاك تواب
وانجيت موسى والبحر قدمه مهيب=وفجرت للاسباط من صخر عذاب
ويوسف رفعته في كبار المناصيب=عقب الفتن والظلم وسجون واتعاب
وارضيت يعقوب وجلبت المذاهيب=عقب التحسب والعمى والترقاب
وايوب صبرته على كل تغليب=وشافيت سقمه بين مغسل و مشراب
ولينت مع داوود زبر الصواليب=يصنع دروع تلبس ويفصل خطاب
ووهبت لسليمان من دون تحسيب=ملك يعم الارض ياخير وهاب
وللريح تشريق من امره وتغريب=وابحكمتك منه الشياطين هياب
ومريم كفلت ارزاقها بالمحاريب=وبريتها عقب الهقاوي والارياب
وعيسى قبل يصلب على اللوح تصليب=شبهت مثله ثم حفظته للاغياب
واغرقت جملة قوم نوح المذانيب=الا قليل في سفينته ركاب
وخربت دار اهل الفسد كل تخريب=ومن تحتها كبكبتهم كل كبكاب
وجنبت لوط ومن معه خير تجنيب=الا عجوز خلفهم تحت الاطواب
واهلكت فرعون بعد طول تكذيب=ومدين وعاد وقوم صالح والاحقاب
وبامرك عن ابراهيم برد مشابيب=وتحت ارجل اسماعيل ما زمزم انساب
واورثت منهم خير الاشباب والشيب=الامي اللي غير قاري وكتاب
اللي وهبته معجزات وتواهيب=حتى نشر دينك وازال التعصاب
ارسلت رسلك بالعدد والتراتيب=واوحيت شرعك مصلح كل ما عاب
وانزلت للعاصين شر المناديب=معهم عجايب قدرتك بطش واعقاب
هذي منازلهم طلول مخاريب=ما كن سكنها الطفل والكهل والشاب
لا مرها الراكب تباطا المراكيب=ولا مرها الرجلي ملت قلبه ارهاب
تفنى حضارات العجم والاعاريب=وانت الذي تبقى وغيرك للاذهاب
آمنت بك واطلبك حسن العواقيب=وايقنت بك متوكد غير مرتاب
مؤمن وراضي بالقدر والمكاتيب=وارجيك ياحلال عسرات الانشاب
ومادمت ربي تسمع ادعاي وتجيب=ما قلت ذا فيني تردا وذا طاب
اشكي عليك جروح اهونهن صعيب=وانت الذي مع قدرتك ما به اصعاب
انا الصويب اللي جروحي معاطيب=ولانفع في علتي طب الاطباب
هم يقلطني على كل تعذيب=من عام الاول حاضر ماله غياب
مازاحه الدواج في فيضة شعيب=ولانفسه شم الهوا عالي هضاب
ولا هونه مزح البني اللواعيب=ولا فرجه مسيار وافين الاصحاب
الى هنا نوم العيون المطاريب=امسي وانا والنفس في لوم وعتاب
امسي على مثل اشتعال المشاهيب=بالمربعانيه وكني بشهر آب
يسري علي الليل داجي و غربيب=متعقد مجروح متوتر اعصاب
شفت الهوايل والعبر والاعاجيب=وانا الذي بين التعجب والاعجاب
واخذت في طرقة زماني تجاريب=وعمر الفتى مره وكل له حساب
لا يادهر يابو سنين معاضيب=وش بك تشيبني وانا توني شاب
هبت عواصيف وسموم ولواهيب=ما نسنست غيث وشذا ورد واطياب
مرت بي الدنيا على كل تاديب=الين بدلت الجهاله بالاداب
كل عليها له طموح ومطاليب=حتى تشال جنازته فوق الارقاب
وكم رمية صابت بلا حسن تصويب=وكم باخص حاذق تركد ولا صاب
ولا شك من يخطي كبار المضاريب=ما حط راس العود للرمي مضراب
وما سطوة الحصني مثل سطوة الذيب=وما وخزة الشوكة مثل قرصة الداب
وماصوت من هيب مثل صوت من هيب=وما هرج مداح مثل هرج سباب
وما ذكر من مجد مثل ذكر من عيب=وما فعل جزلين مثل فعل خياب
وما كل ترحيب بالاقبال ترحيب=وما وجه بشاش مثل وجه غضاب
وما تستر ثياب الحيل والملاعيب=من حطها له من ردا عقله ثياب
وما يبطي خضاب الكفوف المخاضيب=وما ينفع التقليد والطبع غلاب
ومحد يعرف ايون غير المصاويب=ومحد يهاب الداب لو ماله انياب
وكل الطيور تطير ولها مخاليب=وللطيبة حر وللجيفه غراب
ورزقي على باسط فجوج المناكيب=مقسوم لي قبل الحباله والانجاب
ما يمنعه حاسد وحاقد الى جيب=ولا يقطعه غير الولي رب الارباب
ان يسره جاني بدون التسابيب=وان عسره ما فاد فيه التسباب
وقلب الحسد مهما يكن الملاهيب=ما حال دون الرزق بسيوف وحراب
لا تحسبه ياخذ نصيبك تناهيب=لو يلطم الخدين ويطر الاجياب
كم حاسد لا حاش مكسب ولا ثيب=محسوده ايحوش المكاسيب ويثاب
وكلش يجوز انه يجي بالمغاصيب=وكم حاجة بين مغصوب وغصاب
بس الغلا ما فيه غصب بلا طيب=محد يغصب الناس تصفى له احباب
انا بري من الرخوم الزواريب=اللي لهم عن واسع الخير مجناب
ما قولها رجم على غير تجريب=لكن سمعت وشفت وعرفت الاسباب
مفتوحة بيبانهم للعذاريب=وللمرجله ما ينفتح عندهم باب
ومهملين املزمات المواجيب=ومحضرين من الردا كل ما غاب
ومصادقين كل هبوة وتعقيب=ومحاربين كل مصحف ومحراب
ومروجين مكشفات الاكاذيب=ومشكلين وجيههم بالتقلاب
وسلاحهم شذب القفا والعراقيب=ويموت صاملهم ولا شال مشعاب
ولا صار للخيبه رجوم ومراقيب=تلقى لهم رجم على كل مرقاب
ولا صار للطاله دروب مصاعيب=المرجله في سلمهم عيب الاعياب
ولهم تدابير وطرايق واساليب=ومن حطهم له قدوة مثلهم خاب
ومن كانو اصحابه يعاف الاصاحيب=ومن كانو اقرابه ترى ماله اقراب
ومن كانو اخصامه صفت له مشاريب=يامن شجاعتهم ويرقد ولاهاب
ومن هم ضناها عاقر مالها صيب=ومن هم عياله من عقيمين الاصلاب
بروا بالازهاد وتبرو من الطيب=وابعد مغازيهم تهاويل كذاب
رجالهم خايب ومشبوه ومريب=ومطاوع لابليس في كل ما جاب
ايشب في طرق الشبوهات ويشيب=وان عمر يهذري بها عقب ما شاب
يوم الوفا طبع الرجال النواجيب=يقفي زمانه سالب ما به ايجاب
الى صمت يفتل على الخبث اشانيب=والى هرج يكذب ويبهت ويغتاب
ايمللك عند الربوع الاقاريب=ويفشلك عند الرفاقه والاجناب
ولا حاولو لاجواد بالصلح تقريب=من سبته راح الشمل عدة احزاب
عند الرجال يمل ويذل ويخيب=وعند النسا عنتر وابوزيد وذياب
نقص يحسب المنفعه والمكاسيب=لا باع ربعه واتقا بين الاغراب
وما حاش في درب الشقا والمتاعيب=غير الذنوب اللي جمعها ولا تاب

...............

نشرت بتاريخ 16-09-2007


 


Powered by Dawaween V 1.03
تصميم - برمجة

تصميم : الرّاسم لخدمات التصميم برمجة : أبعاد الإنترنت للتطوير