الواجهة الرئيسية I منتديات خزامى نجد I  إتصل بنا
 
 
دواوين الشعراء
القصيدة
قصيدة الملحمه الجابريه ( 100 بيت ) للشاعر سعود المحجان
 

تابع جديدي سجل زواري إهداء القصيدة رشح قصيدتي فهرس ديواني


حكم القدر والموت محدٍ يدانيه= لكن شرع الله والموت سنَه

سنه على كل الخلايق مماشيه= يالله عليك الوقت لاتمتحنَه

وامرٍ كتبه الله بالوح مقضيه=واللي وطاه الموت ماغاب عنَه

هذي سنه والحزن مثلي يخاويه= واشعلت انا التنباك والصدر كنَه

شاعر رهيف احساس والبيت مرهيه= لامن طلبت البيت ماخاب ظنَه

قد قلتها شاعر ومبدع قوافيه= قد الكلام وكلمتي ماتثنَه

والشيخ جابر داخل القلب مغليه= في داخلي جابر وحبه سكنَه

اغليه ومن شوق المحبه نقهويه=واطرب له ابيوت الشعر واتغنَه

واضحك بدون شعور لاحل طاريه= لو الحزن شيًد صروحِ وبنَه

ولامن حضر طيفه اوقف واحييه= يستاهل التقدير شيخ اشهد انَه

عليك ياشيخِ عريبه مجانيه= لامن حضر طيفه عيوني بكنَه

وصاحت هجوسي تالي الليل تبكيه= والفين ونه تقفي الفين ونَه

والفين ونه حاضراتٍِ تعزيه= من حبه اللي داخل القلب منَه

منه ومنه داخل القلب منيه= كلي حزن والحزن رعدٍ وحنَه

مو بس انا اللي اشكي حزني واخبيه= انا مع الشعب الكويتي حزنَه

وشعب الخليج اللي يحبه ويرضيه= واللي ورى لبنان منَه ومنَه

والساحل الشرقي وكازا واهاليه= والساحل الغربي بكى وستجنَه

حتى بلاد الغرب والصين ترثيه= ونشد هل المكسيك والبابا حنَه

واهل اليمن والشام واللي سكن فيه= اكرم كريم ولاهو رجلٍ يمنَه

والهند عزت وستلجت موانيه= وفاضت عيون الهند يوم ادمعنَه

وجزر القمر والموج غطى مراسيه= وتشاد صاحت والعيون اغرقنَه

ونجلترا شعب الكويتي تواسيه= والامريكاني ماهدى وستكنَه

والروسي ضاق وبايناتٍ مواريه= واطلق رصاص الحزن حزن اطلقنَه

والقاهره تبكي سموًة معاليه= لاجل الامير اعلامهم ينكسنَه

واهل فرنسا حزنها مانخليه= كن الهموم السود هن يطرقنَه

حتى فيًنا هلت الدمع صافيه= قامت توجد بين عبره وخنَه

خنَه وصوت الحزن بانت خوافيه= تبكي سموًه واليدين اصفقنَه

واللي ورى سيلان صفق بياديه= ودموع عينه كالنهر سًيلنَه

من موتت اللي كل فرضٍ يصليه= ماغاب عنه الفرض فرضٍ وسنَه

سنة رسول الله والفرض مديه= هذي عوايد شيخنا من فطنَه

يشهد له التاريخ حضر وبواديه= والطيب شاهد والصحف سجلنَه

حتى ملوك الارض بالخير تطريه= بالطيب والمعروف والمجد لانَه

قرمٍ ليا شاف الفقاره تشاكيه= أرًها الكفوف البيض مايبخلنًه

مثل سحاب الخير لاهل مافيه= يسقي هشيم القاع منه اشبعنًه

يشهد عليه الوقت ويا لياليه= كم ديرةٍ طاحت ومنه اعمرنَه

انا اشهد انه راعي الطيب راعيه= ويديه مثل الحر هن يقنصنَه

والطيب ثوبٍ وافي له وزاهيه= والطيب تاجٍ واليدين املكنَه

كل الشعر ويا القوافي تغنيه= لانه سنام العز ماخيبنَه

ماضاع في دربه ولا في هقاويه= يضرب على الكايد ولا تعبنَه

حامي بلاده من غثى الوقت حاميه= وصدره كما درعٍ ليا من غثنَه

كم موقفٍ مرًه وثبًت خطاويه= ورجليه وقت الضيق ما يخذلنَه

افديك يا نبعٍ روى منه ظاميه = يمناك نبع الطيب ياما سقنَه

افديك ياحرٍ تعلًت مراقيه= ماضيُع الصيده ولا ضيعنَه

هذا الامير اللي له الروح تفديه= مرحوم ياشيخٍ له الشوق حنَه

ذكراه في قلبي وشوقي يباريه= لامن طرى جات البيوت ورثنَه

لامن رثيته ماعليًه مشاريه= يستاهل بيوت الفخر لا طرنَه

ياعزوة اللي ضايعاتٍ محاريه= اللي هموم الليل هن جننَه

عز اليتيم وكل شيٍِ موفًيه= اللي سواد الليل هن يتمنَه

الشين عنه ابعيد لا مايجي فيه= والزين كل الزين فيه وظمنَه

دسمان يبكي والليالي تهديه= بان الحزن يوم الليال استرنَه

دسمان مل الحزن والهم طاويه= سود الليالي من بلاهن طونَه

في غيبته يشكي من الهم صاليه= وسيوف هم الليل هن يجرحنَه

وليا انتهى همٍ يجي هم مقفيه= ياشينهن حتى الفرح غيبنَه

ياشين قلبٍ هالليالي تفاجيه=وياشين قلبٍ هالليال اغدرنَه

كن الحزن خيًم على كل اراضيه= وكن الفرح مل البلاد ودفنَه

والقلب مع سود الليالي امنيه=والقلب غير الشيخ لا ماتمنَه

دام الحزن منه فلاني بناسيه= وشلون ابنسى والمشاعر حونَه

مانساه لين العمر يوصل لتاليه=حتى هواجيس الشعر لا نسنَه

اعاتب هجوسي واعيد النظر فيه= واجدد هجوس الحزن في زمنَه

يوم المشاعر بالمشاعر تصافيه= حرام ماربع المشاعر جفنَه

الله اكبر والمشاعر تدفيه= لاصار برد الليل جن احظننَه

سلام ياشيخ سكن قلب غاليه= وعروق قلبي بالغلا هن سقنَه

سلام ياشيخٍ كريمه مساعيه= يوم اليدين البيض هن يكرمنَه

اسمع صدى صوتك ومثلي تناديه= واشوف انا طيفك ليا الليل دنَه

ورد انا صوتي على وادي التيه=والحزن باين والهموم اخنقنَه

يمناي ومًت والمشاعر توميه= والعين هلت والدموع افضحنَه
مثل النهر ولا المحاجر شواطيه= كم واحدٍ مثلي عيونه بلنَه

الله يوم الراس هلت غواديه= متين شطرِ والبيوت احتمنَه

مرحوم ياشيخٍ ولاحدٍ معديه= بالطيب والمعروف لطيب رنَه

يسمع صداه اللي بعيدٍ مراميه= اللي همومه بالليال اذبحنَه

يتعب على اللي هالليالي تشقيه =ويفرح ليا شاف العيون اسعدنَه

يتعب على اللي من زمانه معنيه= ويرتاح لامن العظام اجبرنَه

يتعب على اللي مالقى من يداويه= يجيه وافي واليدين اسعفنَه

يوم الزمن هذا تكاثر بلاويه= تلقاه حرٍ ماالحباري قفنَه

حتى سحاب الخير بالخير تسقيه=من فوق قبر الشيخ ياما رونَه

جابر خوي الطيب والطيب حاويه= يرجح له الميزان لامن وزنَه

تبكي عيون الناس قاصي ودانيه= لانه سخي ولا يديه اقصرنَه

كلمة هلا واهلين هذي مباديه= وعيونه اللي للوطن يسهرنَه

ويديه صارٍ بالليالي مراكيه= وعيونه الثنتين لا ما غفنَه

ونضاعت الاريا فصيحٍ تلاقيه= رايه سديد ولا الليال اخلفنَه

متواضعٍ حده ولاحدٍ يساويه= ودموع عيني لاطرى يذرفنَه

المرجله عنده وماهي حواليه= تعجز حريم الوقت ماينجبنَه

فارس وسيف العز والعز راقيه= يدييه وقت الضيق مايرجفنَه

وعينٍ من الرحمن لاشك ترعيه= ونفسه من الرحمن هي مطمئنَه

شيًد بلاد العز والعز بانيه= لاهنت ياشيخٍ له الطيب فنَه

والصدر مل الحزن والحزن ماليه= في داخلي برقٍ وظرب الاسنَه

وعيني على شرواه هلت تباكيه= وجدي عليه وزايل الشك منَه

من وين مالديت اشوفه واهليه= واقلطه في صدري هيلٍ وبنَه

غالي وله بالقلب شي وبنيه= وعروق جسمي بالعطرعطرنَه

حقي ومن حقي احبه وبديه=لانه امير افعوله هن شيخنَه

واليوم حنا بالميادين نرثيه= وانا اعرف الابيات مايوفينَه

الطيب له ميزه ولاحدٍ يضاهيه= شيخٍ على طيب المراجل تعنَه

حرٍ عريب وافياتٍ مواميه= قد ساعد المحتاج من دون منَه

وهذي كويت العز باسمه تناديه= تبكي سمو المجد تشهد بأنَه

اطلق شنب واشرف مواطي مواطيه= مامات جابر حي و داخل وطنَه

مرحوم ياشيخٍ قويًه عزاويه= يالله عسى الحسنات هن يرفعنَه

مرحوم ياشيخٍ ليا هل ماضيه= شرفً بلاد العز مادنسنَه

مرحوم ياشيخٍ دمح زل مخطيه= يالله عسى الفردوس لشيخ جنَه

امين ياللي بامرك الكون تنهيه= أمين ياعالم بسر الاجنَه

سبحان ربٍ كل شيٍ علم فيه= يعلم بصدر الناس وشهي تكنَه





نشرت بتاريخ 12-12-2007


 


Powered by Dawaween V 1.03
تصميم - برمجة

تصميم : الرّاسم لخدمات التصميم برمجة : أبعاد الإنترنت للتطوير